معلومة صغيرة حبيت أنزلها عشان الطلاب سواء طلاب الماجستير أو طلاب الكليات يعرفوها
دلوقت انت طالما مقيد كطالب في أحد الجامعات المصرية .. انت من حقك إنك تحصل على باسوورد للدخول إلى قواعد البيانات العالمية عن طريق الدخول إلى موقع المجلس الأعلى للجامعات أو مايسمى (اتحاد مكتبات الجامعات المصرية)
www.eulc.edu.eg
ومنها بتشغل البروكسي وتقدر تدخل على قواعد البيانات سواء المحلية أو العالمية المذكورة في الموقع ده وتحمل الأبحاث الكاملة full text اللي عايزها وكمان ممكن من خلال الموقع ده إن تبحث عن أي اسم كتاب عايزه والموقع هيدلك على مكان الكتب ده (موجود في أنهي كليات في مصر وعدد النسخ المتوفرة عشان لو حبيت تروح تستعيره من المكان ده وطبعا شروط الاستعارة بتختلف من مكان لمكان وكمان يديك معلومات عن المؤلف وسنة النشر و… الخ) وممكن كمان من خلال الموقع إنك تبحث عن آخر أبحاث نشرتها كليتك
دي صورة للموقع ودي بعض قواعد البيانات العالمية اللي من حقك تدخل عليها وتحمل الأبحاث اللي محتاجها زي مثلا ال
Sciencedirect
Springer
Wiley
Ovid Midline
EBSCO
Global Health
عشان تجيب اليوزر نيم والباسوورد بتوعك بتروح مكتبة الكلية عندك وبتملى استمارة وبعدين بتحدد الباسوورد اللي عايزها وهما هناك بيدوك رقم معين (ده يوزر نيم) + الباسوورد اللي انت اخترتها وبعدين بتدخل على الموقع ده وتشغل البروكسي + تدخل الباسوورد بتاعتك واليوزرنيم (الطريقة هتلاقيها مشروحة في الموقع نفسه لما تيجي تفعل الباسوورد وبتختلف من متصفح إلى آخر فايرفوكس أو اكسبلورر) ولو فيه مشكلة ممكن نساعد بعض في حلها إن شاء الله
ملحوظة صغيرة : فيه بعض الأبحاث لا يمكن تحميلها حتى بعد الدخول على قاعدة البيانات ودي غالبا بتبئا الأبحاث الحديثة جدا والموقع بيخليها مدة بفلوس بس الأبحاث دي مش كتير ولم أصادفها خلال بحثي إلا مرات قليلة
أنا حبيت أنزل الموضوع ده عشان يفيد أكبر عدد ممكن من الطلاب الشغوفين بمجال الأبحاث وبصراحة لأني اتمنيت إنه حد يعرفني الموضوع ده وأنا طالبة في الكلية لسه .. وكمان عشان لو فيه حد عنده مشكلة في الدخول يقول ممكن أقدر أساعده بمشيئة الرحمن
